GUIDELINES FOR DISPLAY IN CHURCHES

“ಮ್ಹಜೆಂ ಘರ್ ಮಾಗ್ಣ್ಯಾಚೆಂ ಘರ್ ಮ್ಹಣ್ ಆಪಯ್ತಲೆ”

ಲಿತುರ್ಜಿಕ್ ಆಚರಣಾಂ ವೆಳಿಂ ದೃಶ್ಯ್ ಮಾಧ್ಯಮಾಂ ವಾಪರ‍್ಚ್ಯೆ ವಿಶಿಂ ಹಿಶಾರೆ

ಮೊಗಾಚ್ಯಾ ಭಾವಾಂನೊ ಆನಿ ಭಯ್ಣಿಂನೊ,
2021 ಮಾರ್ಚ್ 23ವೆರ್ ಮಂಗ್ಳುರ್ ದಿಯೆಸೆಜಿಚ್ಯಾ ಗೊವ್ಳಿಕ್ ಸಮಾಲೋಚನಾಕ್ ಜಮ್ಲಲ್ಯೆ ತ್ಯೆ ವೆಳಿಂ ಇಗರ್ಜೆಚಿ ಪವಿತ್ರತಾ, ಮಿಸಾ ಉಪ್ರಾಂತ್ ಲ್ಹಾನ್ ಅಭಿನಂದನ್ ಕಾರ್ಯಿಂ ಆಸಾ ಕರ್ಚಿಂ ಆನಿ ಫೊಟೊಗ್ರಪಿ,ü ವಿಡಿಯೊಗ್ರಫಿ ಆನಿ ಲೈವ್ ಟ್ರಾನ್ಸ್‍ಮಿಶನ್ ವಿಶಿಂ ಮೊಟ್ವಿ ಭಾಸಾಭಾಸ್ ಚಲ್ಲಿ. “ಸಗ್ಳೆಂ ಮರ್ಯಾದಿನ್ ಆನಿ ಮಾಂಡಾವಳಿನ್ ಜಾಯ್ಶೆಂ” (1 ಕೊರಿಂಥ್ 14:40) ಬಿಸ್ಪಾನ್ ನಿರ್ದೇಶ್ ದಿಂವ್ಕ್ ಯಾಜಕಾಂನಿ ವಿಚಾರ್ಲೆಂ. ಹ್ಯಾ ಪರಿಪತ್ರಾಂತ್, ಆಮ್ಚೆಂ ಚಡ್ ಗುಮನ್ ಜಾಯ್ ತ್ಯೊ ದೋನ್ ಗರ್ಜೆಚ್ಯೊ ಸಂಗ್ತಿ ಹಾಂವ್ ಹಾತಾಳ್ತಾಂ: 1. ಇಗರ್ಜೆಚಿ ಪವಿತ್ರತಾ ಆನಿ ಲವ್ಕಿಕ್ ಕಾರ್ಯಿಂ ಚಲೊಂವ್ಚಿಂ; 2. ಪವಿತ್ರ್ ಕಾರ್ಯಾಂಚಿ ಫೊಟೊಗ್ರಫಿ, ವಿಡಿಯೊಗ್ರಫಿ ಆನಿ ಲೈವ್ ಸ್ಟ್ರೀಮಿಂಗ್.

1. ಇಗರ್ಜೆಚಿ ಪವಿತ್ರತಾ:

ಆಮಿ ಬಹು-ಧಾರ್ಮಿಕ್ ಸನ್ನಿವೆಶಾಂತ್ ಜಿಯೆತಾಂವ್. ಹರ್ ವ್ಯಕ್ತಿ ಏಕ್ ವಾ ಏಕ್ ರಿತಿರ್ ದೆವಾಕ್ ಸೊದ್ತಾ. ದೆವಾಕ್ ಭೆಟುಂಕ್ ಆನಿ ಆರಾಧನಾಚ್ಯಾ ಸುವಾತ್ಯಾಂಕ್ ವಚುಂಕ್ ಲೋಕ್ ಆಪ್ಣಾಕ್‍ಚ್ ಆಯ್ತಿಂ ಕರ್ತಾತ್. ಮಾಗ್ಣ್ಯಾಚ್ಯೆ ಸುವಾತೆಕ್ ತಾಳ್ ಪಡ್ತಾ ತಸಲಿ ನಿತಳ್ ಮುಸ್ತಾಯ್ಕಿ ನ್ಹೆಸ್ತಾತ್ ಆನಿ ಆಪ್ಣಾಕ್ ದೆವಾ ಥಂಯ್ ಆಸಾ ತೊ ಮಾನ್ ದಾಕೊಂವ್ಕ್ ಆಪ್ಣಾಕ್‍ಚ್ ಮಾನಾನ್ ನ್ಹೆಸ್ತಾತ್. ತಿಂ ವಯುಕ್ತಿಕ್ `ದರ್ಶನಾ’ ಖಾತಿರ್ ಭಕ್ತಿಪಣಾನ್ ವೆತಾತ್. ಆರಾಧನಾಚ್ಯೆ ಸುವಾತೆಚೆಂ ವಾತಾವರಣ್ ಪವಿತ್ರ್‍ಪಣ್ ಉಚಾರ್ಚ್ಯೆ ಬರಿಂ ಸಾಂಬಾಳ್ಳಲೆಂ ಆಸಾ. ಭೊವ್ ಪವಿತ್ರ್ ಸುವಾತೆಕ್ ಯಾಜಕಾನ್ ಮಾತ್ರ್ ಪ್ರವೇಶ್ ಜಾಂವ್ಕ್ ಅವ್ಕಾಸ್ ಆಸ್ತಾ. ಭಕ್ತಿಕಾಂ ಆಪ್ಲೆ ದೊಳೆ ಧಾಂಪುನ್ ರಾವ್ತಾತ್, ಪ್ರಣಾಮ್ ಕರ್ತಾತ್ ವಾ ಧ್ಯಾನಾನ್ ಭರುನ್ ಬಸುನ್ ದಯ್ವಿಕ್ ಸಕತ್ ಆಪ್ಣಾಶಿಂ ವಚುಂಕ್ ಸೊಡ್ತಾತ್. ಆಪ್ಲಿ ದಿಷ್ಟ್ ಮಾಗ್ಣ್ಯಾಚೆರ್ ವಾ ಪವಿತ್ರ್ ಪುಸ್ತಕಾಚೆರ್ ಕೆಂದ್ರಿತ್ ಕರ್ಚ್ಯೆ ಥಾವ್ನ್ ತಾಂಕಾಂ ಕಿತೆಂಚ್ ಆಡ್ಕಳ್ ಜಾಯ್ನಾ. ಮಾಗ್ಣ್ಯಾಚ್ಯಾ ವೆಳಾರ್ ಹೆರ್ ಸಗ್ಳೆಂಚ್ ರಾವಜೆ. ಪವಿತ್ರ್ ಜಾಗ್ಯಾರ್ ಸಾಮಾಜಿಕ್ ಕಾರ್ಯಾವಳ್ ಆಸ್ಚಿ ನ್ಹಯ್! ಸಂಸಾರಿ ಸಂಗ್ತಿ ಕಿತ್ಲ್ಯೊ ಉತ್ತೀಮ್ ತರ್‍ಯಿ ತ್ಯೆ ವಿಶಿಂ ತಿಂ ಚಿಂತುಂಕ್ ಸಕನಾಂತ್.
ಪನ್ರ್ಯಾ ಸೊಲ್ಲ್ಯಾಂತ್ ಜೆರುಜಲ್ಯಾಚೆಂ ದೆವಾಳ್ ಮ್ಹಳ್ಯಾರ್ ದೆವಾನ್ ಎಕ್ಯೆ ಖೆರಿತ್ ರಿತಿರ್ ವಸ್ತಿ ಕರ್ಚಿ ಆನಿ ಆರಾಧನ್ ಭೆಟೊಂವ್ಚಿ ಸುವಾತ್. ಲೋಕ್ ವ್ಹಡ್ ಸಂತೊಸಾನ್ ಕೀರ್ತನಾಂ ಗಾವ್ನ್ ಥಂಯ್ ವೆತಾಲೊ. ಪೂಣ್ ಕ್ರಮೇಣ್ ತ್ಯೆ ಸುವಾತೆಚೊ ಮುಳಾವೊ ಇರಾದೊ ಚುಕ್ಲೊ ತೆದ್ನಾಂ ಜೆಜುನ್ ದೆವಾಳ್ ನಿತಳ್ ಕೆಲೆಂ ಆನಿ ಸಾಂಗಾತಾಚ್ ಆಪ್ಲಿ ಕೂಡ್ ದೇವ್ ವಸ್ತಿ ಕರ್ತಾ ತೆಂ ಖರೆಂ ದೆವಾಳ್ ಮ್ಹಣ್ ಪರ್ಗಟ್ಲೆಂ (ಪಳೆ, ಜುವಾಂವ್ 2:21). ಬಾಪ್ತಿಜ್ಮ್ ಘೆತ್ಲಲ್ಯಾಂಕ್ ಕ್ರಿಸ್ತಾಚಿ ಕೂಡ್ ಮ್ಹಣ್ ಪರ್ಗಟ್ಲಲೆಂ ಆಸಾ ಆನಿ ಪುತಾ ಆನಿ ಪವಿತ್ರ್ ಅತ್ಮ್ಯಾ ವರ್ವಿಂ ಬಾಪಾಕ್ ಅರಾಧನ್ ಭೆಟೊಂವ್ಕ್ ತಾಂಕಾಂ ಆಪಯ್ಲಾಂ.
ಸಾಂ ಪಾವ್ಲಾನ್ ಕ್ರಿಸ್ತಾಂವಾಂಕ್ ವೆವೆಗ್ಳ್ಯೆ ರಿತಿರ್, ತಿಂ ಕ್ರಿಸ್ತಾ ಥಂಯ್ ದೆವಾಚೆಂ ಜಿವಾಳ್ ಮಂದಿರ್ ಮ್ಹಣ್ ಸ್ಪಷ್ಟ್ ಕೆಲೆಂ ಆನಿ ದೆವಾಚ್ಯಾ ಆಪೊವ್ಣ್ಯಾಕ್ ಫಾವೊ ತಶೆಂ ಜಿಯೆಂವ್ಕ್ ಉಲೊ ದಿಲೊ: “ತುಮಿ ದೆವಾಚೆಂ ಮಂದಿರ್ ಆನಿ ದೆವಾಚೊ ಅತ್ಮೊ ತುಮ್ಚ್ಯೆ ಥಂಯ್ ಬಿಡಾರ್ ಕರುನ್ ಆಸಾ ಮ್ಹಣ್ ತುಮಿ ನೆಣಾಂತ್? ತುಮ್ಚ್ಯೊ ಕುಡಿ ಪವಿತ್ರ್ ಅತ್ಮ್ಯಾಚಿಂ ಮಂದಿರಾಂ ಮ್ಹಣ್ ತುಮಿ ನೆಣಾಂತ್? ತೊಚ್ ಅತ್ಮೊ ತುಮ್ಚ್ಯೆ ಥಂಯ್ ವಸ್ತಿ ಕರ್ತಾ ನ್ಹಯ್? ದೆವಾನ್‍ಚ್ ತಾಕಾ ಏಕ್ ದೆಣೆಂ ಕಸೊ ತುಮ್ಕಾಂ ದಿಲಾ! ತುಮಿ ತುಮ್ಚಿಚ್ ಆಸ್ತ್ ನ್ಹಯ್. ವರ್ತೆಂ ಮೊಲ್ ದಿವ್ನ್ ತುಮ್ಕಾಂ ವಿಕ್ತಿಂ ಘೆತ್ಲ್ಯಾಂತ್. ದೆಕುನ್ ತುಮ್ಚ್ಯೆ ಕುಡಿನ್ ದೆವಾಕ್ ಮಹಿಮಾ ದಿಯಾ! (1 ಕೊರಿಂತ್ 3:16-17; 6:19-20). ದೋಗ್ ವಾ ತೇಗ್ ಆಪ್ಲ್ಯಾ ನಾಂವಾನ್ ಜಮ್ಲ್ಯಾತ್ ಥಂಯ್ ಆಪುಣ್ ಹಾಜರ್ ಆಸಾ ಮ್ಹಣ್ ಜೆಜುನ್ ಖಾತ್ರಿ ದಿಲ್ಯಾ (ಪಳೆ, ಮಾತೆವ್ 18:20).
ಉಗ್ಡಾಪಣಾಚ್ಯಾ ಪ್ರೇರಣಾನ್ ವಾತಿಕನ್ ದುಸ್ರಿ ಸಭಾ ಅಶೆಂ ಶಿಕಯ್ತಾ: ದೆವಾನ್ ಮನ್ಶಾಂಕ್ “ಎಕಾಮೆಕಾ ಥಂಯ್ ಬಾಂದ್ ವಾ ಸಂಬಂಧ್ ನಾತ್ಲಲಿಂ ವಯುಕ್ತಿಕ್ ಮನ್ಶಾಂ ಕಶಿಂ ನ್ಹಯ್ ಬಗರ್ ಭಾಗೆವಂತ್ಪಣಾನ್ ಆಪ್ಣಾಕ್ ವಳ್ಕತಾತ್ ಆನಿ ಆಪ್ಲಿ ಸೆವಾ ಕರ್ತಾತ್ ತಸಲಿ ಏಕ್ ಪರ್ಜಾ ಕಶಿ ಕರುನ್ ತಾಂಕಾಂ ಬಚಾವ್ ಕರುಂಕ್ ಖುಶಿ ವ್ಹೆಲಿ” (ಐಉ 9). ದೆವಾಚ್ಯಾ ಪುತಾನ್ ಹ್ಯೆ ಸಂಸಾರಿಂ “ಸಾರ್ವತ್ರಿಕ್ ಸಾಕ್ರಾಮೆಂತ್” ಕಸೊ ಪವಿತ್ರ್ ಸಭಾ ಸ್ಥಾಪ್ಲ್ಯಾ (ಐಉ 48), ಮ್ಹಣ್ಜೆ ಸಗ್ಳ್ಯಾ ಲೊಕಾಕ್ ಸಾಲ್ವಾಸಾಂವಾಚೊ ಏಕ್ ಘುರ್ತ್ ಆನಿ ಏಕ್ ಹಾತೆರ್; ಪವಿತ್ರ್ ಸಭಾ ದೆವಾಕ್ ಮಹಿಮಾ ದಿಂವ್ಕ್, ಸಗ್ಳ್ಯಾ ಸಂಸಾರಾಕ್ ಬಚಾವೆಚ್ಯೆ ಖಬ್ರೆ ಸಂಗಿಂ ಸುವಾರ್ತಾ ಪರ್ಗಟುಂಕ್ ಆನಿ ಜೆಜುಚೊ ಮೊಗಾಚೊ ಉಪದೆಸ್ ಜಿಯೆಂವ್ಕ್ ಹ್ಯೆ ಸಂಸಾರಿಂ ಆಸಾ.
ದೆವಾಚಿ ಯಾತ್ರಿಕ್ ಪರ್ಜಾ ಕಶಿ ಸಂಸಾರಿಂ ಪವಿತ್ರ್ ಸಭೆಕ್ ದೆವಾಚ್ಯಾ ಭುಗ್ರ್ಯಾಂಚೆಂ ಘನ್ ಆನಿ ಸ್ವತಂತ್ರ್ ಆಸಾ. ದೆವಾಚ್ಯಾ ಭುಗ್ರ್ಯಾಂಚ್ಯಾ ಕಾಳ್ಜಾಂತ್ ಏಕ್ ದೆವಾಳ್ ಕಶೆಂ ಪವಿತ್ರ್ ಅತ್ಮೊ ವಸ್ಥಿ ಕರ್ತಾ. ಜೆಜುನ್ ಆಮ್ಚೊ ಮೋಗ್ ಕೆಲೊ ತಸೊ ನವೊ ಉಪದೆಸ್ ತಾಂಚೆಂ ನವೆಂ ನಿಯಮ್ (ಪಳೆ, ಜುವಾಂವ್ 13:34). ದೆವಾಚೆಂ ರಾಜ್ ತಾಚೊ ಶೆವಟ್ (ಐಉ 9). ಏಕ್ ಸಮುದಾಯ್ ಕಶಿ ಪವಿತ್ರ್ ಸಭೆ ಥಂಯ್ ಏಕ್ ಗುಂಡಾಯೆಚಿ ಎವ್ಕರಿಸ್ತಿಕ್ ಸಮ್ಜಣ ಆಸಾ ಆನಿ ಆಪ್ಲ್ಯೊ ಅತ್ಮಿಕ್ ಗರ್ಜೊ ಪುತ್ರ್ಯೊ ಕರ್ಚ್ಯೆ ಖಾತಿರ್, “ಅತ್ಮ್ಯಾನ್ ಆನಿ ಸತಾನ್” (ಜುವಾಂವ್ 4:24) ದೆವಾಕ್ ಆರಾಧನ್ ಭೆಟೊಂವ್ಕ್ ತಿಕಾ ಸುವಾತಿ ಜಾಯ್. ಸುರ್ವಿಲಿಂ ಕ್ರಿಸ್ತಾಂವಾಂ ಘರಾಂನಿ ಉಂಡೊ ಮೊಡ್ತಾಲಿಂ. ಮಿಲಾನಾಚ್ಯಾ ಧಾರ್ಮಿಕ್ ಸುಟ್ಕೆಚ್ಯಾ ಮಸುದ್ಯಾ ಉಪ್ರಾಂತ್ (313 ವರ್ಸಾ) ತಾಣ ಂ ಇಗರ್ಜೆಚಿಂ ಬಾಂದ್ಪಾಂ ಉಬಾರುಂಕ್ ಸುರು ಕೆಲೆಂ. ಹಾಂಗಾ ಸಕ್ಲಾ ದಿಲ್ಯಾತ್ ತೆ ಥೊಡೆ ವಿಶಯ್ ಇಗರ್ಜಾಂಚೆಂ ಘನ್, ಉದ್ದೇಶ್ ಆನಿ ಪವಿತ್ರ್‍ಪಣ್ ಸ್ಪಷ್ಟ್ ಕರ್ತಾತ್. ಜಿವ್ಯಾ ದೆವಾಚೆಂ ಮಂದಿರ್, ಸತಾಚೊ ಖಾಂಬೊ ಆನಿ ಬುರುಜ್ ಆಸ್ಲಲ್ಯೆ ದೆವಾಚ್ಯೆ ಪವಿತ್ರ್ ಸಭೆಂತ್ (1 ತಿಮೊಥಿ 3:15) ಕಸ್ಲೆಂ ವರ್ತನ್ ದಾಕೊಂವ್ಚೆಂ ಮ್ಹಣ್ ಮನಾಂತ್ ಹಾಡ್ತಿತ್. ಮಾಗ್ಣೆಂ ಆನಿ ಆರಾಧನಾಕ್ ಮ್ಹಣ್ ಆಪ್ಣಾ ಭಿತರ್ ಘೆವ್ನ್ ಆಸ್ಲಲೆಂ ಇಗರ್ಜೆಚೆಂ ಬಾಂದಪ್‍ಚ್ ಸಗ್ಳ್ಯಾ ಪವಿತ್ರ್ ಸಭೆಚೊ ಭಾಯ್ಲೊ ಘುರ್ತ್.

i. ಏಕ್ ಬಾಂದಪ್ ಕಶೆಂ ಇಗರ್ಜೆಚೆಂ ಘನ್ ಕಿತೆಂ?

ಇಗರ್ಜ್ ದೆವಾಚೆಂ ಘರ್ ಆನಿ ಮಾಗ್ಣ್ಯಾಚಿ ಸುವಾತ್ ಮ್ಹಣ್ ಆಮಿ ಖಂಡಿತ್ ಮಾಂದ್ತಾಂವ್. “ತುಂ ಎಕ್ಲೊಚ್ ಪವಿತ್ರ್, ತುಂ ಎಕ್ಲೊಚ್ ಸೊಮಿ, ತುಂ ಎಕ್ಲೊಚ್ ಭೊವ್ ವರ್ತೊ” ಮ್ಹಳ್ಳೊ ಜೆಜು ಕ್ರಿಸ್ತ್ ಥಂಯ್ ಹಾಜರ್ ಆಸಾ. ಪಾತ್ರಿಯಾರ್ಕ್ ಜಾಕೊಬಾಚ್ಯಾ ಉತ್ರಾಂನಿ ಆಮಿ ಅಶೆಂ ವಳ್ಕತಾಂವ್: “ಕಿತ್ಲೊ ಭಿರಾಂಕುಳ್ ಹೊ ಜಾಗೊ! ಹೆಂ ದೆವಾಚೆಂಚ್ ಘರ್ ಶಿವಾಯ್ ದುಸ್ರೆಂ ಕಿತೆಂಚ್ ನ್ಹಯ್. ಹೊ ಸರ್ಗಾಚೊ ದಾರ್ವಟೊ” (ಉತ್ಪತ್ತಿ 28:17). ವ್ಹಡ್ ಭಾವಾಡ್ತಾನ್ ಇಗರ್ಜೆಕ್ ಯೆತಲಿಂ ದೆವಾಚ್ಯೆ ಹಾಜ್ರೆನ್ ಭರ್ಲಲೆಂ ಸಗ್ಳೆಂ ವಾತಾವರಣ್ ಅಸಲೆಂ ವಿಜ್ಮಿತ್ ಕರ್ಪಿ ಮ್ಹಣ್ ಭೊಗ್ತಾತ್.

ii. ದೆವಾಚ್ಯೆ ಇಗರ್ಜೆಂತ್ ಆಮ್ಚೊ ಹುಸ್ಕೊ ಕಿತೆಂ ಜಾಂವ್ಕ್ ಜಾಯ್?

ತ್ಯೆ ಸುವಾತೆಕ್ ಜೆಜು ಥಂಯ್ ದೆವಾಕ್ ಭೆಟುಂಕ್ ವೆತಾಂವ್ ಮ್ಹಣ್ ಆಮಿ ಪಾತ್ಯೆಂವ್ಕ್ ಜಾಯ್. ಕ್ರಿಸ್ತ್ ಆಮ್ಚ್ಯೆ ಮಧೆಂ ವೆವೆಗ್ಳ್ಯಾ ರಿತಿಂನಿ ಹಾಜರ್ ಆಸಾ ಮ್ಹಣ್ ದುಸ್ರ್ಯೆ ವಾತಿಕನ್ ಸಭೆನ್ ಭರ್ ದಿಲಾ: “ಎವ್ಕರಿಸ್ತಾಚ್ಯಾ ಸಾಕ್ರಾಮೆಂತಾಂತ್ ಆಪ್ಲ್ಯಾ ಮ್ಹಣ ಯಾರ್ಯಾ ಥಂಯ್ ಮಾತ್ರ್ ನ್ಹಯ್ ಪೂಣ್ ಎವ್ಕರಿಸ್ತಿಕ್ ಉಂಡ್ಯಾ ವಾಯ್ನಾಂತ್ ತೊ ಖೆರಿತ್‍ಪಣ ಂ ಹಾಜರ್ ಆಸಾ… ತೊ ಆಪ್ಲ್ಯಾ ಉತ್ರಾಂತ್ ಹಾಜರ್ ಆಸಾ. ಇಗರ್ಜೆಂತ್ ಪವಿತ್ರ್ ಪುಸ್ತಕ್ ವಾಚ್ತಾನಾ ತೊಚ್ ಉಲಯ್ತಾ. ನಿಮಾಣೆಂ, ಪವಿತ್ರ್ ಸಭಾ ಮಾಗ್ತಾನಾ ಆನಿ ಗಾಯ್ತಾನಾ ತೊ ಹಾಜರ್ ಆಸಾ, ಕಿತ್ಯಾಕ್ ಜಂಯ್ ದೋಗ್ ವಾ ತೇಗ್ ಮ್ಹಜ್ಯೆ ನಾಂವಿಂ ಸಾಂಗಾತಾ ಮೆಳ್ತಾತ್ ಥಂಯ್ ಹಾಂವ್ ತಾಂಚ್ಯೆ ಮದ್ಗತ್ ಆಸಾಂ (ಮಾತೆವ್ 18:20) ಮ್ಹಣ್ ತಾಣೆಂ ಭಾಸಾಯ್ಲಾಂ (Sಅ 7).

iii. ಇಗರ್ಜೆ ಬಾಂದಪ್ ಮ್ಹಳ್ಯಾರ್ ಕಿತೆಂ? ತೆಂ ಕಿತ್ಯಾಕ್ ಬಾಂದ್ಲಾಂ:

ಪವಿತ್ರ್ ಸಭೆಚೆಂ ನಿಯಮ್ (ಛಿoಜe oಜಿ ಛಿಚಿಟಿoಟಿ ಟಚಿತಿ) ಇಗರ್ಜ್ “ದಯ್ವಿಕ್ ಆರಾಧನಾ ಖಾತಿರ್ ಆಸ್ಚೆಂ ಪವಿತ್ರ್ ಬಾಂದಪ್” ಮ್ಹಣ್ತಾ (ಅIಅ 1214). ಕಥೊಲಿಕ್ ಪವಿತ್ರ್ ಸಭೆಚಿ ದೊತೊರ್ನ್ ಅಶೆಂ ಶಿಕಯ್ತಾ: “ದೆವಾಚ್ಯಾ ಹ್ಯಾ ಘರಾಂತ್, ಕ್ರಿಸ್ತ್ ಖರೊಚ್ ಹಾಜರ್ ಆಸಾ ಆನಿ ಕ್ರಿಯಾಳ್ ಆಸಾ ಮ್ಹಣ್ ಹ್ಯೆ ಸುವಾತೆರ್ ಆಸ್ಚ್ಯಾ ಘುರ್ತಾಂಚ್ಯಾ ಸತಾ ಆನಿ ಸಮತೋಲನಾ ವರ್ವಿಂ ದಾಕಯ್ಜೆ” (ಅಅಅ 1181). ಎವ್ಕರಿಸ್ತಾಚೆಂ ವರ್ತೆಂ ಮಾಗ್ಣೆಂ ವಿಸ್ತಾರ್ಚೆಂ ಆನಿ ಆಪ್ಣಾ ಭಿತರ್ ಘೆಂವ್ಚೆಂ ಧ್ಯಾನ್ ಆನಿ ವೊಗೆಪಣಾಚ್ಯಾ ಮಾಗ್ಣ್ಯಾಕ್ ಹಿ ಸುವಾತ್ ಆಮ್ಕಾಂ ಆಪಯ್ತಾ” (ಅಅಅ 1185). “ದೆಕುನ್ ಸುವಾರ್ತೆಚ್ಯಾ ಪವಿತ್ರ್ ಲಕ್ಷಣಾಕ್ ಸಾರ್ಕೆಂ ಪಡನಾ ತೆಂ ಕಾಡುಂಕ್ ಜಾಯ್” (ಅIಅ 1220).

iv. ಇಗರ್ಜೆಂತ್ ಚಲೊಂವ್ಚ್ಯಾ ಸಗ್ಳ್ಯಾ ಕಾರ್ಯಾಂ ಪಯ್ಕಿ ಎವ್ಕರಿಸ್ತಾಕ್ ಕೇಂದ್ರ್ ಸ್ಥಾನ್ ಆಸಾ.

ಎವ್ಕರಿಸ್ತ್ ಕ್ರಿಸ್ತಿ ಜಿಣ ಯೆಚಿ ಝರ್ ಆನಿ ಶಿಖರ್ (ಐಉ 11) ಆನಿ ಎವ್ಕರಿಸ್ತಾಂತ್ ಪವಿತ್ರ್ ಸಭೆಚೆಂ ಸಗ್ಳೆಂ ಅತ್ಮಿಕ್ ಬರೆಪಣ್ ಆಸಾ, ಮ್ಹಣ್ಜೆ ಕ್ರಿಸ್ತ್, ಆಮ್ಚೆಂ ಪಾಸ್ಕ್ (Pಔ 5; ಅಅಅ 1324), ಆನಿ “ಎವ್ಕರಿಸ್ತಾ ವಿಣೆಂ ಜಿಯೆಂವ್ಕ್ ಅಸಾಧ್ಯ್” (Sಚಿಛಿಡಿಚಿmeಟಿಣum ಛಿಚಿಡಿiಣಚಿಣis 95) ಮ್ಹಣ್ ಅಬಿತೆನೆಚ್ಯಾ ಮಾಡ್ತಿರಾಂನಿ ಮ್ಹಳಾಂ. ದೆಕುನ್ ಪವಿತ್ರ್ ಸುವಾತ್ ವಾ ಭೊವ್ ಪವಿತ್ರ್ ಎವ್ಕರಿಸ್ತ್ ಸಂಭ್ರಮ್ತಾತ್ ಆನಿ ವಾಂಟ್ತಾತ್, ಭಾವಾಡ್ತಿ ಜಮ್ತಾತ್ ಆನಿ ಸಾಕ್ರಿಫಿಸಾಚ್ಯೆ ಆಲ್ತಾರಿರ್ ದೆವಾಚೊ ಪೂತ್ ಆಮ್ಚ್ಯಾ ಸೊಮ್ಯಾಚಿ ಹಾಜ್ರಿ ಆಸಾ ಆನಿ ಸಕತ್ ಆನಿ ಬೆಸಾಂವಾಂ ಭಾವಾಡ್ತ್ಯಾಂಚೆರ್ ಘಾಲ್ತಾತ್, ತಿ ಸುವಾತ್ ಖತಾವಿಣ್ ಆನಿ ಮಾಗ್ಣ್ಯಾಕ್ ಆನಿ ಪವಿತ್ರ್ ಕಾರ್ಯಾಂಕ್ ಫಾವೊ ತಸಲಿ ಜಾಯ್ಜೆ” (Pಔ 5; eಜಿ. ಅಅಅ 1180). ಜಿಂ ಜವಾಬ್ದಾರ್ ಆಸಾತ್ ತಾಣ ಂ ಇಗರ್ಜೊ ನಿತಳ್, ಸೊಬಿತ್ ಆನಿ ಸಂಭ್ರಮಿಕ್ ಆಸಶೆಂ ಪಳೆಂವ್ಕ್ ಜಾಯ್.

v) ಅತ್ಮಿಕ್ ಸಂಸಾರಿಪಣ್ (Spiritual worldliness):

ಪಾಪಾ ಫ್ರಾನ್ಸಿಸ್ ಸಾಂಗ್ತಾ ತಶೆಂ ಆಜ್ ಸ್ವ ಮಹಿಮಾ ವಾಡಯ್ತಾ ತಸಲೆಂ ಅತ್ಮಿಕ್ ಸಂಸಾರಿಪಣ್ ಇಗರ್ಜಾಂ ಭಿತರ್ ರಿಗುನ್ ಆಸಾ ಆನಿ ತೆಂ ಆಮ್ಚ್ಯಾ ಭಾವಾಡ್ತಾಕ್ ಮಾರೆಕಾರ್ ಜಾವ್ನ್ ಆಸಾ. “ಅತ್ಮಿಕ್ ಸಂಸಾರಿಪಣ್ ಜೆಂ ದೇವ್‍ಭಿರಾಂತಿಚ್ಯೆ ದಾಕೊವ್ಣೆ ಪಾಟ್ಲ್ಯಾನ್ ಆನಿ ಪವಿತ್ರ್ ಸಭೆಚ್ಯಾ ಮೊಗಾ ಪಾಟ್ಲ್ಯಾನ್ ಲಿಪ್ತಾ ತೆಂ ಸೊಮ್ಯಾಚಿ ಮಹಿಮಾ ನ್ಹಯ್ ಪೂಣ್ ಮನ್ಶಾಚಿ ಮಹಿಮಾ ಆನಿ ಖಾಸ್ಗಿ ಬರೆಪಣ್ ಆಶೆತಾ… ಹೆಂ ಸೊಮ್ಯಾಚಿ ನ್ಹಯ್ ಆಪ್ಣಾಚಿ ಖುಶಿ ಸೊದ್ಚಿ ಏಕ್ ಕುಯುಕ್ತೆಚಿ ವಾಟ್ (ಫಿಲಿಪ್ಪಿ 2:21). ಹೆಂ ಜಾಗ್ರುತ್ಕಾಯೆನ್ ಘಡ್ಲಲ್ಯಾ ದಾಕೊವ್ಣ್ಯಾಂಚೆರ್ ರೊಂಬ್ಲಲೆಂ ಆಸಾ ಮ್ಹಣ್ತಚ್, ಹೆಂ ಸದಾಂಚ್ ಭಾಯ್ಲ್ಯಾ ಪಾತ್ಕಾಚೆರ್ ಲಾಗುನ್ ಆಸನಾ; ಭಾಯ್ಲ್ಯಾನ್ ಸಗ್ಳೆಂ ದಿಸುಂಕ್ ಜಾಯ್ ತಶೆಂ ದಿಸ್ತಾ” (ಇಉ 93). ಪಾತ್ಕಾಚೊ ಅಪಾಯ್ ಆಮ್ಚ್ಯಾ ದಾರಾರ್ ಆಸಾ, ಆನಿ ಆಮಿ ತಾಚೆರ್ ಜಯ್ತ್ ವ್ಹರಿನಾಂವ್ ತರ್ ತೆಂ ಆಮ್ಚೆರ್ ಜಯ್ತ್ ವ್ಹರ್ತಲೆಂ (ಪಳೆ, ಉತ್ಪತ್ತಿ 4:7).

vi) ಇಗರ್ಜ್ ಸೊಮ್ಯಾಕ್ ಭೆಟಯ್ಲಲಿ:

ಮಾಗ್ಣೆಂ ಆನಿ ಪವಿತ್ರ್ ತೆಲಾಂಚ್ಯೆ ಮಾಖ್ಣೆ ವರ್ವಿಂ ಇಗರ್ಜ್ ಸೊಮ್ಯಾಕ್ ಭೆಟಯ್ಲಲಿ ಆಸಾ ಮ್ಹಣ್ ಆಮಿ ಖರೆಪಣ ಂ ಮಾಂದ್ತಾಂವ್. ಆಲ್ತಾರ್‍ಯಿ, ತೆಲಾಯ್ಲಲ್ಯಾ ಕ್ರಿಸ್ತಾಚಿ ಪ್ರತಿನಿಧಿ ಕಶಿ ಆಸುಂಕ್ ತೆಲಾಯ್ಲಲಿ ಆಸಾ. ಆಮ್ಕಾಂಯ್ ತ್ಯಾಚ್ ತೆಲಾನ್ ಬಾಪ್ತಿಜ್ಮಾಚ್ಯಾ, ಕ್ರಿಜ್ಮಾಚ್ಯಾ ಆನಿ ಯಾಜಕ್ ಆನಿ ಬಿಸ್ಪಾಂಕ್ ಒಡ್ದಿ ವೆಳಾ ತೆಲಾಯ್ಲಲೆಂ ಆಸಾ. ಆಮಿ ಆಮ್ಚಿಂಚ್ ನ್ಹಯ್. ಆಮಿ ಫಕತ್ ತಾಚಿಂ (ಪಳೆ, 1 ಕೊರಿಂಥ್ 6:19). ಗ್ರೀಕ್ ಉತರ್ `ಕಿರಿಯಾಕೆ’ ಆನಿ ಜಾಚ್ಯೆ ಥಾವ್ನ್ ಇಂಗ್ಲಿಷ್ ಉತರ್ `ಚರ್ಚ್’ ಆನಿ ಜರ್ಮನ್ ಉತರ್ `ಕೀರ್ಶೆ’ ಘೆತ್ಲ್ಯಾಂತ್ ತಾಚೊ ಅರ್ಥ್ “ಜೆಂ ಸೊಮ್ಯಾಚೆಂ” (ಅಅಅ 751). `ಚರ್ಚ್’ ಮ್ಹಳ್ಳ್ಯಾ ನಾಂವಾರ್ ವಳ್ಕುಂಚೆಂ ಬಾಂದಪ್ ಆನಿ ಸಮುದಾಯ್ ಸೊಮ್ಯಾನ್ ಅಸ್ತಿತ್ವಾಕ್ ಹಾಡ್ಲಾ ಆನಿ ಆಜುನ್ ಚಡ್ತಿಕ್ ವಾಸ್ತವಿಕತೆ ತೆವ್ಶಿಂ ವಾಟ್ ದಾಕಯ್ತಾ. ಇಗರ್ಜೆಚ್ಯಾ ಪ್ರತಿಷ್ಟಾಪನಾ ವೆಳಾ ಬಿಸ್ಪ್ ಅಶೆಂ ಗಾಯ್ತಾ: “ಹಾಂಗಾ ಖರ್ಯಾ ದೆವಾಳಾಚ್ಯಾ ಮಿಸ್ತೆರಾಚಿ ಸಾವ್ಳಿ ಆಸಾ, ಹಾಂಗಾ ಸರ್ಗಿಂಚ್ಯಾ ಜೆರುಜಲೆಮಾಚೆಂ ರೂಪ್ ಆಸಾ.” ದೆಕುನ್ ಏಕ್ ಬಾಂದಪ್ ಕಶೆಂ ಇಗರ್ಜ್ ಏಕ್ ಘುರ್ತ್, ರುಪ್ಣೆಂ ಆನಿ ಸರ್ಗಿಂಚ್ಯಾ ಸಂಗ್ತಿಂಚಿ ಪ್ರತಿನಿಧಿ ಕಶಿ ಆಸಾ. ತಿ ಆಮಿ ಉಣ್ಯಾ ಮೊಲಾಚ್ಯಾ ಸಂಗ್ತಿಂಚ್ಯಾ ಜಾಗ್ಯಾಂಚ್ಯಾ ಪಾಂವ್ಡ್ಯಾಕ್ ಹಾಡುಂಕ್ ಜಾಯ್ನಾ.

vii) ಲವ್ಕಿಕ್ ಆನಿ ಸಾಮಾಜಿಕ್ ಕಾರ್ಯಿಂ:

ಇಗರ್ಜ್ ದೆವಾಕ್, ಆಮ್ಕಾಂ ಆನಿ ಆಮ್ಚ್ಯಾ ಸಾಲ್ವಾಸಾಂವಾ ಖಾತಿರ್ ಭೆಟಯ್ಲ್ಯಾ ಆಸ್ತಾಂ ಥಂಯ್ ಆಸ್ತಾಂ ಥಂಯ್ ಲವ್ಕಿಕ್ ಆನಿ ಸಾಮಾಜಿಕ್ ಕಾರ್ಯಿಂ ಕರುಂಕ್ ನಜೊ. ಮಾಗ್ಣ್ಯಾಚೆಂ ಘರ್ ವ್ಯಾಪಾರಾಚಿ ಸುವಾತ್ ಜಾವ್ನ್ ಬದ್ಲಲ್ಲಿ ಪಳೆಲ್ಲ್ಯಾ ಜೆಜುಚೊ ಪವಿತ್ರ್ ರಾಗ್ ಪೆಟ್ಲೊ. ತಾಣೆಂ ಏಕ್ ಚಾಬುಕ್ ವಿಣ್ಲೆಂ ಆನಿ ವಿಕ್ತಲ್ಯಾಂಕ್ ಆನಿ ಘೆತಲ್ಯಾಂಕ್ ಭಾಯ್ರ್ ಧಾಂವ್ಡಾಯ್ಲೆ. ತಾಣೆಂ ತಾಂಕಾಂ ಮ್ಹಳೆಂ: “ಮ್ಹಜೆಂ ಘರ್ ಮಾಗ್ಣ್ಯಾಚೆಂ ಘರ್ ಮ್ಹಣ್ ಆಪಯ್ತಲೆ; ಅಶೆಂ ಪವಿತ್ರ್ ಪುಸ್ತಕಿಂ ಬರಯ್ಲಾಂ; ಪೂಣ್ ತುಮಿ ತೆಂ ಚೊರಾಂಚೆಂ ಭುಂಯಾರ್ ಕೆಲಾ!” (ಮಾತೆವ್ 21:13); “ಮ್ಹಜ್ಯಾ ಬಾಪಾಚೆಂ ಘರ್ ಏಕ್ ವ್ಯಾಪಾರಾಚಿ ಸಾಂತ್ ಕರಿನಾಕಾತ್” (ಜುವಾಂವ್ 2:16). ಥಂಯ್, ಆರಾಧನಾಚಿ ಸುವಾತ್ ಮುನಾಫೊ ಜೊಡ್ಚ್ಯಾ ವ್ಯಾಪಾರಾಚೊ ಜಾಗೊ ಕೆಲ್ಲಿ. ಜೆಜುಚ್ಯಾನ್ ಹೆಂ ಪಳೆವ್ನ್ ಸೊಸುಂಕ್ ಜಾಲೆಂನಾ. ಇಗರ್ಜ್ ವಾಪರ್ಚ್ಯೆ ಬಾಬ್ತಿನ್ ಆಮಿ ಜೆಜುಚ್ಯಾ ಹ್ಯಾ ವರ್ತನಾ ವಿಶಿಂ ಗಂಭೀರಾಯೆನ್ ಗುಮನ್ ದಿಂವ್ಕ್ ಜಾಯ್.

viii) ಇಗರ್ಜೆಂತ್ ಕಸಲಿಂ ಕಾರ್ಯಿಂ ಕರುಂಕ್ ಪರ್ವಣ ್ಗ ಆಸಾ?

ಸಂಪ್ರದಾಯಾ ಪ್ರಕಾರ್ ದಾನಿಂಕ್ ಮಾನ್ ದಿಂವ್ಕ್ ಮಿಸಾ ಆದಿಂ ವಾ ಉಪ್ರಾಂತ್ ವಾತಿ ವಾಂಟುಂಕ್, ಪ್ರಸಾದ್ ಪ್ರಾರ್ಥನಾ ಉಪ್ರಾಂತ್ ವಾ ನಿಮಾಣ್ಯಾ ಆಶಿರ್ವಾದಾ ಉಪ್ರಾಂತ್ ಕಳೊವ್ಣ್ಯೊ ಕರುಂಕ್, ರಿತಿಂಚ್ಯಾ ಪುಸ್ತಕಾಂತ್ ಆಸಾ ತಶೆಂ ಮರ್ಣಾಚಿ ಶೃದ್ಧಾಂಜಲಿ ದಿಂವ್ಕ್; ನವ್ಯಾ ಫಿರ್ಗಜ್ ಯಾಜಕಾಕ್ ಸೆವೆ ಸ್ಥಾನಾರ್ ಬಸೊಂವ್ಕ್ ಆನಿ ಸಂಬಂಧಿತ್ ಸೆರೆಮನಿ ಇತ್ಯಾದಿ. ಫಿರ್ಗಜ್ ಕುಟ್ಮಾಚ್ಯಾ ಸಾಂದ್ಯಾಂನಿ ಪುರಸ್ಕಾರ್ ಜೊಡ್ಲ್ಯಾತ್ ತೆದ್ನಾಂ ಫಿರ್ಗಜ್ ವಿಗಾರಾನ್ (ವಾ ತಾಚ್ಯಾ ನಾಂವಾನ್ ಕಳೊವ್ಣಿ ದಿತಾತ್ ತಾಣ ಂ) ಕಳೊವ್ಣೆ ವೆಳಿಂ ಮೊಟ್ವ್ಯಾನ್ ಉಲ್ಲಾಸುಂಚಿಂ ಉತ್ರಾಂ ಉಲೊವ್ಯೆತ್. ಸಂಭ್ರಮಿತ್ ಸಂದರ್ಭಾಂನಿ ಆನಿ ಮರ್ಣಾಂಚ್ಯಾ ವೆಳಾರ್ ಫೊಟೊಗ್ರಫಿ, ವೀಡಿಯೊಗ್ರಫಿ ಆನಿ ಲೈವ್ ಸ್ಟ್ರೀಮಿಂಗಾಕ್ ಅವ್ಕಾಸ್ ಆಸಾ. ಇಗರ್ಜೆಚ್ಯಾ ಆನಿ ಲಿತುರ್ಜಿಕ್ ಆಚರಣಾಚ್ಯಾ ಪವಿತ್ರ್‍ಪಣಾಕ್ ಜೊಕ್ತೊ ಮಾನ್ ದಿವ್ನ್ ಆನಿ ಫುಡ್ಲ್ಯಾ ಭಾಗಾಂತ್ ಸಾಂಗ್ಲಾಂ ತಿಂ ಸುಚನಾಂ ಪಾಳುನ್ ತೆಂ ಕರುಂಕ್ ಜಾಯ್.

ix) ಕಿತ್ಯಾಕ್ ಪರ್ವಣ ್ಗ ನಾ?

ಶೊಲ್, ಝೆಲೆ, ತುರೆ, ಯಾದಿಸ್ತಿಕಾ, ಇನಾಮಾಂ ವಾಂಟ್ಚಿಂ, ಜಲ್ಮಾ ದಿಸಾಕ್ ಕೇಕ್ ಕಾತರ್ಚಿ ಆನಿ ಗಾಂವ್ಚೆಂ, ಗೊಡ್ಶೆಂ ಆನಿ ಖಾಣ್ ವಾಂಟ್ಚೆಂ, ಅಸಲ್ಯಾ ಉಲ್ಲಾಸುಂಚ್ಯಾ ಕಾರ್ಯಾಂಕ್, ಲಾಂಬ್ ಆದೆವ್ಸ್ ಕಾರ್ಯಾಂಕ್ ಪರ್ವಣ ್ಗ ನಾ. ಬೂಕ್ ವಾ ಸಿಡಿ ಪರ್ಗಟುಂಕ್ ಆಲ್ತಾರ್ ಏಕ್ ಸುವಾತ್ ನ್ಹಯ್. ಫೊರ್ಟಿಕೊ ವಾ ಹೊಲಾಕ್ ವಚುಂಕ್ ಸಾಂಗ್ಲ್ಯಾರ್ ಲೋಕ್ ರಾಂವ್ಚೊ ನಾ ಮ್ಹಳ್ಳೆಂ ನೀಬ್ ಇಗರ್ಜೆಚ್ಯಾ ಪವಿತ್ರ್‍ಪಣಾ ವಿಶಿಂ ಚಿಂತಪ್ ದಾಕಯ್ತಾ ಆನಿ ಥಂಯ್ಚೆಂ ಮಾಗ್ಣ್ಯಾಚೆಂ ವಾತಾವರಣ್ ಉಲ್ಲಾಸುಂಕ್ ವಾ ಲೊಕಾಚ್ಯೆ ಖುಶೆ ಪ್ರಕಾರ್ ಬದ್ಲಿ ಕರುಂಕ್ ಜಾತಾ ಮ್ಹಣ್ ಕಳಯ್ತಾ. ಇಗರ್ಜ್ ಏಕ್ ಕಾರ್ಯಾಸಾಲ್ ಕರುಂಕ್ ಪರ್ವಣ ್ಗ ನಾ. ತಶೆಂಚ್ ಮೀಸ್ ಜಾಲ್ಲೆಂಚ್ ಆಲ್ತಾರಿ ಮುಕಾರ್ ಕದೆಲಾಂ ಮಾಂಡುನ್ ಕಾರ್ಯೆಂ ಕರ್ಚೆಂ, ಆತಾಂಚ್ ಆಮಿ ಕಿತೆಂ ಸಂಭ್ರಮ್ಲಾಂ ತ್ಯೆ ವಿಶಿಂ ಆಮಿ ಗಂಭೀರ್ ನಾಂವ್ ಮ್ಹಣ್ ದಾಕಯ್ತಾ. ಆಮಿ ವೆಗಿಂಚ್ ಸಾರ್ಕಿ ಎವ್ಜಣ್ ಕೆಲ್ಯಾರ್ ಆಮಿ ಉಲ್ಲಾಸುಂಚಿಂ ಕಾರ್ಯಿಂ ಎಕ್ಯೆ ಫಾವೊತ್ಯೆ ಸುವಾತೆರ್, ತ್ಯೆ ಖಾತಿರ್ ಜೊಕ್ತೊ ವೇಳ್ ದಿವ್ನ್ ಕರ್ಯೆತ್.

x) ಆಮ್ಚಿ ಮುಸ್ತಾಯ್ಕಿ:

ತ್ಯಾ ವೆಳಾಕ್ ಜೊಕ್ತಿ ಜಾಲ್ಲಿ ಆಸುಂಕ್ ಜಾಯ್. ಆಮಿ ರಾಷ್ಟ್ರಾಚ್ಯಾ ಅಧ್ಯಕ್ಷಾಕ್ ಮೆಳುಂಕ್ ಸಾದ್ಯೆ ಮುಸ್ತಾಯ್ಕೆರ್ ವಚನಾಂವ್‍ಮೂ? ಆಮಿ ಇಗರ್ಜೆಕ್ ವೆಚೆಂ ದೆವಾಕ್‍ಚ್ ಮೆಳುಂಕ್ ಆನಿ ತಾಕಾ ಆಮ್ಚ್ಯಾ ಜಿವಿತಾಂತ್ ಘೆಂವ್ಕ್. ಹ್ಯಾ ಇರಾದ್ಯಾ ಥಾವ್ನ್ ಭಕ್ತಿಕಾಂಚೆಂ ಗುಮಾನ್ ಘುಂವ್ಡಾಯ್ತಾ ತಸಲ್ಯೆ ಮುಸ್ತಾಯ್ಕೆಕ್ ಪರ್ವಣ ್ಗ ನಾ. ಆಮ್ಚಿ ಮುಸ್ತಾಯ್ಕಿ ಆಮ್ಚ್ಯಾ ಸೊಮ್ಯಾಕ್ ಆನಿ ತಾಚ್ಯಾ ಲೊಕಾಕ್ ಆಮಿ ಕಿತ್ಲೊ ಮಾನ್ ದಿತಾಂವ್ ತೆಂ ದಾಕಯ್ತಾ. ಅರ್ಧೆಂ ಪ್ಯಾಂಟ್, ತ್ರಿ ಫೊರ್ತ್, ಛಾಪ್ಲಲಿಂ ಟಿ ಶರ್ಟಾಂ, ಕಾತಿಕ್ ಲಾಗ್ಚಿ ಮುಸ್ತಾಯ್ಕಿ, ಖೆಳಾಚಿ ಮುಸ್ತಾಯ್ಕಿ, ದೊಂಪ್ಳೆ ಆಸ್ಚಿಂ ಜೀನ್ಸ್, ಆನಿ ಕೂಡ್ ದಾಕಯ್ತಾ ತಸಲಿ ಹೆರ್ ಕಸಲಿಯ್ ಮುಸ್ತಾಯ್ಕಿ ಪವಿತ್ರ್ ಜಾಗ್ಯಾಕ್ ನಾ ಫಾವೊ. ಸೊಮ್ಯಾಕ್ ಮೆಳುಂಕ್ ವೆತಾನಾ ಆಪ್ಲಿಂ ಭುರ್ಗಿಂ ಕಶೆಂ ನ್ಹೆಸ್ತಾತ್ ತ್ಯೆ ವಿಶಿಂ ಜಲ್ಮ್‍ದಾತಾರಾಂನಿ ಚಡ್ತಿಕ್ ಗುಮನ್ ದಿಂವ್ಕ್ ಜಾಯ್. ದೆವಾಚೆಂ ಉತರ್ ವಾಚುಂಕ್, ಕೀರ್ತನಾಂ ಗಾಂವ್ಕ್ ಆನಿ ಭಾವಾಡ್ತ್ಯಾಂಚಿಂ ಮಾಗ್ಣಿಂ ವಾಚುಂಕ್ ಆಲ್ತಾರಿಕ್ ವೆತಾತ್ ತಾಣ ಂ ಆಪ್ಲ್ಯೆ ಮುಸ್ತಾಯ್ಕೆ ವಿಶಿಂ ವಿಶೇಸ್ ಗುಮನ್ ದಿಂವ್ಕ್ ಜಾಯ್.

ಇಗರ್ಜೆ ಬಾಂದಪ್ ವೆವೆಗ್ಳಿಂ ಕಾರ್ಯಿಂ ಚಲೊಂವ್ಚಿ ಸುವಾತ್ ನ್ಹಯ್. ಮೀಸ್ ಏಕ್ ಸಾಂಸ್ಕøತಿಕ್ ಕಾರ್ಯೆಂ ನ್ಹಯ್. ಹೆಂ ಏಕ್ ಪವಿತ್ರ್ ಬಾಂದಪ್, ಸೊಮ್ಯಾನ್ ಆಮ್ಕಾಂ ದಿಲ್ಲೆ ಪವಿತ್ರ್ ಮಿಸ್ತೆರ್ ಸಂಭ್ರಮ್ಚ್ಯೆ ಖಾತಿರ್ ವೆಗ್ಳೆಂ ದವರ್ಲಲೆಂ. ಸೊಮಿ ಸಾಂಗ್ತಾ: “ಚಕ್ರವರ್ತಿಚೆಂ ಚಕ್ರವರ್ತಿಕ್ ದಿಯಾ, ದೆವಾಚೆಂ ದೆವಾಕ್ ದಿಯಾ” (ಮಾರ್ಕ್ 12:17). ದೆವಾಚಿಂ ಹಕ್ಕಾಂ ಲೆಕಿನಾಶೆಂ ಉರ್ಚೆಂ ನ್ಹಯ್. ತೊ ಆಪ್ಲ್ಯೆ ಪರ್ಜೆನ್ ಖರ್ಯಾನ್‍ಚ್ ಸ್ವತಂತ್ರ್‍ಪಣ ಂ ಆಸುಂಕ್ ಆಶೆತಾ. ಹೆಂ ಘನ್ ಆನಿ ಸ್ವತಂತ್ರ್ ಹರೆಕ್ಲ್ಯಾಕ್ ಖಾತ್ರೆನ್ ಮೆಳಶೆಂ ದೆವಾಚ್ಯಾ ಮ್ಹಣ ಯಾರ್ಯಾಂನಿ ಗುಮನ್ ದಿಂವ್ಕ್ ಜಾಯ್.

+ಪೀಟರ್ ಪಾವ್ಲ್ ಸಲ್ಡಾನ್ಹಾ
ಮಂಗ್ಳರ‍್ಚೊ ಬಿಸ್ಪ್

Updating Soon…