GUIDELINES FOR PHOTOGRAPHS IN CHURCHES

ಫೊಟೊಗ್ರಫರ್ ಆನಿ ವಿಡಿಯೋಗ್ರಫರ್ ಹಾಣಿಂ ಪಾಳುಂಕ್ ಜಾಯ್ ತಿಂ ನಿಯಮಾಂ:

ಸಾಕ್ರಾಮೆಂತಾಂತ್ ಘೆತ್ಲಲ್ಯಾ ದೆಣ್ಯಾಂಚೊ ಉಗ್ಡಾಸ್ ಜಿವೊ ದವ್ರುಂಕ್ ಆಮ್ಕಾಂ ಫೊಟೊ ಜಾಯ್ ಪಡ್ತಾತ್. ಥೊಡ್ಯಾ ಸಂದರ್ಭಾಂನಿ ಆಮಿ ಕೆಲ್ಲಿ ಭಾಸಾವ್ಣಿ ನವ್ಯಾನ್ ಜಿಯೆಂವ್ಕ್ ತ್ಯೊ ಆಧಾರ್ ಜಾತಾತ್. ಫೊಟೊಗ್ರಫರ್ ಆನಿ ವಿಡಿಯೊಗ್ರಫರ್ ಭಾವಾಡ್ತಿ ಮನಿಸ್. ಲಿತುರ್ಜಿಕ್ ಕಾರ್ಯಾಂತ್ ವೆವೆಗ್ಳ್ಯಾ ಸಂದರ್ಭಾಂಕ್ ಸಾರ್ಕೆಂ ವರ್ತನ್ ದಾಕೊವ್ನ್ ಕಾರ್ಯಾಳ್ ಭಾಗ್ ಘೆಂವ್ಕ್ ತಾಂಕಾಂಯ್ ಆಪೊವ್ಣೆ ದಿಲಾಂ. ತೆ ಹೆರ್ ಭಾವಾಡ್ತಾಚ್ಯಾ ಸಂಪ್ರದಾಯಾಚೆ ತರ್ ತಾಣಿಂ ಇಗರ್ಜೆಚೆಂ ಪವಿತ್ರ್‍ಪಣ್ ಸಾಂಬಾಳುಂಕ್ ಸಂಬಂಧ್ ಜಾಲ್ಲ್ಯಾ ವ್ಯಕ್ತಿಂನಿ ತಾಂಕಾಂ ಸುಚನ್ ದಿಂವ್ಕ್ ಜಾಯ್. ಕ್ಯಾಮರಾ ವಾ ವಿಡಿಯೊ ಹಾತಾಳ್ತಲೆ ಕ್ರಿಸ್ತಾಂವ್ ಆಚರಣಾಂ ವಿಶಿಂ ನೆಣಾರಿ ತರ್ ತಾಂಕಾಂ ನಿರ್ದೇಶ್ ದಿಂವ್ಕ್ ಜಾಯ್. ತಾಣಿಂ ಸಂದರ್ಭಾಕ್ ವಾಜ್ಬಿ ತಶೆಂ ನ್ಹೆಸಜೆ ಆನಿ ದೆವಾಚ್ಯಾ ಘರಾಕ್ ಸಾರ್ಕೆಂ ದಿಸ್ತಾ ತಸಲಿ ಶಿಸ್ತ್ ಸಾಂಬಾಳುಂಕ್ ಜಾಯ್.
ಘನಾಧಿಕ್ ಆನಿ ಭಕ್ತಿಕ್ ರಿತಿನ್ ಲಿತುರ್ಜಿ ಸಂಭ್ರಮ್ತಾನಾ ಹಾಂಗಾ ದಿಲ್ಲಿಂ ನಿಯಮಾಂ ಪಾಳುಂಕ್ ಜಾಯ್.

i) ಸಂಭ್ರಮ್ತಾನಾ ಫೊಟೊ ಕಾಡುಂಕ್ ಜಾಯ್ ಪಡ್ತಾತ್ ತೆ ಸಾಕ್ರಾಮೆಂತ್ ಆನಿ ಸಾಕ್ರಾಮೆಂತಾಲ್ ಹೆ: ಬಾಪ್ತಿಜ್ಮ್, ಪಯ್ಲೊ ಕುಮ್ಗಾರ್, ಕ್ರಿಜ್ಮ್, ಒಡ್ದ್, ಲಗ್ನ್, ಜುಬ್ಲೆವ್ ಆನಿ ಮರ್ಣಾಂ. ಹಾಂತುಂ ಆಚರಣಾಂಕ್ ಖೆರಿತ್ ಮ್ಹಣ್ ದಿಸ್ಚೆ ಚಾರ್ ವಾ ಪಾಂಚ್ ಸಂದರ್ಭ್ ವಿಂಚಾ. ಇಗರ್ಜೆಂತ್ಲ್ಯಾ ಕಾರ್ಯಾಂ ವೆಳಾರ್ ಮಾಗ್ಣೆಂ ಕರ್ತಲ್ಯಾ ಆನಿ ಕುಮ್ಗಾರಾಚ್ಯಾ ಪುಶ್ರ್ಯಾಂವಾರ್ ಆಸ್ಚ್ಯಾ ಭಾವಾಡ್ತ್ಯಾಂಚೆರ್ ವಿಡಿಯೊ ಕ್ಯಾಮರಾ ಘುಂವ್ಡಾಂವ್ಚೆಂ ಚುಕೊಂವ್ಕ್ ಜಾಯ್. ಸಗ್ಳೆಂ ಗುಮನ್ ಆಲ್ತಾರಿಕ್ ಆನಿ ಸಾಕ್ರಾಮೆಂತ್ ಘೆತಾತ್ ತ್ಯಾ ವ್ಯಕ್ತಿಂಚೆರ್ ದವರ್ಲಲೆಂ ಜಾಯ್ಜೆ.

ii) ಕಾರ್ಯೆಂ ಮಾಂಡುನ್ ಹಾಡ್ಲಲ್ಯಾಂನಿ ಎಕಾ ಹಫ್ತ್ಯಾ ಆದಿಂ ತರ್‍ಯಿ ಫಿರ್ಗಜ್ ವಿಗಾರಾಕ್ ವಾ ಇಗರ್ಜೆಚಿ ಜವಾಬ್ದಾರಿ ಪಳೆತಾ ತ್ಯಾ ಯಾಜಕಾಕ್ ಮೆಳುನ್ ಗರ್ಜೆಚ್ಯಾ ದಸ್ತಾವೆಜಾಂಕ್ ಸಯ್ ಘಾಲುಂಕ್ ಜಾಯ್ ಆನಿ ಇಗರ್ಜೆಂತ್ ಮಾಗ್ಣ್ಯಾರ್ ಆಸ್ಚ್ಯಾ ಜಮ್ಯಾಚೆಂ ಗುಮನ್ ವೊಡಿನಾಸ್ತಾಂ ಖಂಯ್ಚ್ಯೆ ಸುವಾತೆರ್ ರಾವುನ್ ಆಪ್ಣೆಂ ಫೊಟೊ/ವಿಡಿಯೊ ಕಾಡ್ಯೆತ್ ತೆಂ ಪಯ್ಲೆಂಚ್ ಪಳೆಂವ್ಕ್ ಜಾಯ್.

iii) ಫೇಸ್‍ಬುಕ್/ಯುಟ್ಯೂಬ್/ಟಿವಿ ಹಾಂಚೆರ್ ಲೈವ್ ಸ್ಟ್ರೀಮಿಂಗ್ ಕರ್ಚೆಂ ಆಸಾ ತರ್ ಫಿರ್ಗಜ್ ವಿಗಾರಾ ಥಾವ್ನ್ ಪಯ್ಲೆಂಚ್ ಪರ್ವಣ ್ಗ ಘೆಂವ್ಕ್ ಜಾಯ್. ಹೆರ್ ಕಿತೆಂಯ್ ಚಡ್ತಿಕ್ ಮಾಂಡಾವಳ್ ಜಾಯ್ ತರ್ ತೆಂ ತಾಚ್ಯೆ ಕಡೆ ಉಲೊಂವ್ಕ್ ಜಾಯ್. ಸೆಲ್‍ಫೊನಾರ್ ಥಾವ್ನ್ ಲೈವ್‍ಸ್ಟ್ರೀಮಿಂಗ್ ಕರಿಜೆ ತರ್ ತೆಂ ಆಲ್ತಾರಿರ್ ದವರ್ಚೆಂ ಪಡ್ತಾ ದೆಕುನ್ ತೆಂ ಚುಕೊಂವ್ಕ್ ಜಾಯ್. ಅಸಲಿ ಮಾಂಡಾವಳ್ ಸಂಭ್ರಮ್ ಚಲಯ್ತಲ್ಯಾಚೆಂ ಗುಮನ್ ವಿಶೇಸ್ ಮಾಪಾನ್ ವೊಡ್ತಾ.

iv) ಡಿಫ್ಯೂಜರ್ ಅಂಬ್ರೆಲ್ಲಾ, ಫೊಟೊ ಆನಿ ವಿಡಿಯೊ ಲೈಟ್ ರ್ಯಾಕ್ ಆನಿ ಜಿಂಬಲ್ಸ್ ಭಾವಾಡ್ತ್ಯಾಂಕ್ ಆಲ್ತಾರ್ ಪಳೆಂವ್ಕ್ ಆಡ್ಕಳ್ ಜಾತಾತ್ ದೆಕುನ್ ತಾಂಚೊ ವಾಪರ್ ಆಡ್ವರ್ಲಾ. ಫೊಟೊ ಕಾಡ್ತಲ್ಯಾಂನಿ ಇಗರ್ಜೆ ಭಿತರ್ ಫ್ಲ್ಯಾಶ್ ವಾಪರ್ಚೆಂ ಚುಕೊಂವ್ಕ್ ಜಾಯ್. ಕ್ಯಾಮರಾಂತ್ ಯೆಂವ್ಚೊ ಸದಾಂಚೊ ಖಂಯ್ಚೊಯ್ ಆವಾಜ್ ಬಂದ್ ದವ್ರುಂಕ್ ಜಾಯ್. ತಸಲೆ ಆವಾಜ್ ಲಿತುರ್ಜಿಂತ್ ವಾಂಟೆಲಿ ಜಾತಲ್ಯಾಂಕ್ ಆಡ್ಕಳ್ ಜಾತಾತ್. ವಿಡಿಯೊ ಕ್ಯಾಮರಾ ವಾಪರ್ಲಾ ತರ್ ತೊ ಎಕ್ಯೆಚ್ ಕಡೆ ಆಜುನ್ ಕಸಲೊಯ್ ಲೈಟಿಂಗ್ ನಾತ್ಲಲೊ ಜಾಯ್ಜೆ.

v) ಉಂಡ್ಯಾ ವಾಯ್ನಾಚೆರ್ ಆಶಿರ್ವಾದಾಚೆಂ ಮಾಗ್ಣೆಂ ಮ್ಹಣ್ತಾನಾ, ಹೊಸ್ತ್ ಆನಿ ಕಾಲ್ಸ್ ಉಬಾರ್ತಾನಾ ಆನಿ “ತ್ಯಾಚ್ ಜೆಜು ವರ್ವಿಂ” ಮಾಗ್ಣ್ಯಾ ವೆಳಾರ್ ಫೊಟೊಗ್ರಫಿ ಕರ್ಚಿ ಬರಿ ನ್ಹಯ್, ಕಿತ್ಯಾಕ್ ತ್ಯೆ ವರ್ವಿಂ ಭಾವಾಡ್ತ್ಯಾಂಕ್ ಲಿತುರ್ಜಿಚ್ಯಾ ಪವಿತ್ರ್ ಘಡಿತಾಂಚೆರ್ ಗುಮನ್ ಖಂಚೊವ್ಕ್ ಆಡ್ಕಳ್ ಜಾತಾ. ಖರೆಂ ಮ್ಹಳ್ಯಾರ್ ಲಿತುರ್ಜಿ ವೆಳಾರ್ ಕಾಡ್ಲಲ್ಯೊ ಸಗ್ಳ್ಯೊ ಫೊಟೊ ಪ್ರಿಂಟ್ ಜಾಯ್ನಾಂತ್ ಆನಿ ಪ್ರಿಂಟ್ ಜಾಲ್ಲ್ಯೊ ಸಗ್ಳ್ಯೊ ಫೊಟೊ ಆಲ್ಬಮಾಕ್ ಪಾವನಾಂತ್. ತರ್ ಫೊಟೊಗ್ರಾಫರಾನ್ ಲೊಕಾಚೆಂ ಗುಮನ್ ಆಪ್ಣಾಶಿಂ ವೊಡುಂಕ್ ಆನಿ ಭಾವಾಡ್ತ್ಯಾಂನಿ ಅತ್ಮಿಕ್ ಅನ್ಬೊಗ್ ಆಪ್ಲೊ ಕರುಂಕ್ ಕಿತ್ಯಾಕ್ ಆಡ್ಕಳ್ ಜಾಂವ್ಕ್ ಜಾಯ್?

vi) ಮಿಸಾ ವೆಳಾರ್ ಫೊಟೊಗ್ರಫಿ ಆನಿ ವಿಡಿಯೊಗ್ರಫಿ ಕರ್ತಲ್ಯಾಂನಿ ಆಲ್ತಾರಿ ಮುಕ್ಲ್ಯಾ ಮಧ್ಲ್ಯಾ ಸಾಲಾಂತ್ ರಾಂವ್ಚೆಂ ನ್ಹಯ್ ಬಗರ್ ಬಗ್ಲೆಕ್ ರಾವಜೆ. ಸಾಕ್ರಾಮೆಂತ್ ದಿಂವ್ಚ್ಯೆ ತ್ಯೆ ಘಡಿಯೆ ಮಾತ್ರ್ ತಾಣ ಂ ಮಧೆಂ ಯೆವ್ಯೆತ್. ಲಿತುರ್ಜಿಕ್ ವೊಗೆಪಣ್, ಎಕೊಡೆಂ ಗಾಯನ್, ಸುವಾರ್ತಾ ಪರ್ಗಟ್ಣಿ, ಶೆರ್ಮಾಂವ್ ಅಸಲ್ಯಾ ವೆಳಾರ್ ತಾಣ ಂ ಇಗರ್ಜೆಂತ್ ಹೆಣೆಂ ತೆಣೆಂ ಭೊಂವ್ಚೆಂ ನ್ಹಯ್. ತಾಣ ಂ ಇಗರ್ಜೆ ಭಿತರ್ ಗರ್ಜೆ ಭಾಯ್ರ್ ಹೆವ್ಶಿನ್ ತೆವ್ಶಿನ್ ವೆಚೆಂ ಚುಕಯ್ಜೆ.

vii) ಪಯ್ಲೆಂಚ್ ಮಾಂಡಾವಳ್ ಕೆಲಲ್ಯಾ ಫೊಟೊ ಕಾರ್ಯಾಂತ್ (ದೆಕಿಕ್, ರೆಸ್ಪೆರಾ ಉಪ್ರಾಂತ್), ಇಗರ್ಜೆಂತ್ ಶಿಸ್ತೆಚೆಂ ವಾತಾವರಣ್ ಉರಶೆಂ ಪಳೆಜೆ. ಗ್ರೂಪ್ ಫೊಟೊ ಇಗರ್ಜೆ ಭಾಯ್ರ್ (ಇಗರ್ಜೆಚ್ಯಾ ಮೆಟಾಂಚೆರ್, ಪೊರ್ಟಿಕೊಂತ್) ಕಾಡಿಜೆ ಕಿತ್ಯಾಕ್ ಇಗರ್ಜೆಂತ್ ಮಾಗ್ಣ್ಯಾಕ್ ಅವ್ಕಾಸ್ ಕರುನ್ ದಿಜೆ. ಲಿತುರ್ಜಿ ವೆಳಾ ಇಗರ್ಜೆ ಭಿತರ್ ಸೆಲ್ಫಿ ಫೊಟೊಗ್ರಫಿ ಕರ್ಚಿ ನ್ಹಯ್.

viii) ಎಕ್ಯೆ ವ್ಯಕ್ತಿಚಿ ವಾ ಹೊಕ್ಲೆ ನವ್ರ್ಯಾಚಿ ಫೊಟೊ ಜಾಯ್ಜೆ ತರ್ ತಿ ನಿಮಾಣೆಂ ಗೀತ್ ಜಾಲ್ಯಾ ಉಪ್ರಾಂತ್ ಕಾಡಿಜೆ. ಆಜುನ್ ಇಗರ್ಜೆ ಭಿತರ್ ಮಾಗ್ಣೆಂ ಕರುನ್ ಆಸಾತ್ ತಾಂಕಾಂ ಧೊಸ್ಚೆಂ ನ್ಹಯ್. ನಿಮಾಣ್ಯಾ ಗಿತಾ ವೆಳಿಂ ಫೊಟೊ ಕಾಡ್ಚ್ಯೊ ಪವಿತ್ರ್ ವಾತಾವರಣಾಕ್ ಆಡ್ಕಳ್ ಜಾತಾ. ಗಿತಾಂಯ್ ಮಾಗ್ಣಿಂ ಆಸುನ್, “ಜೊ ಗಾಯ್ತಾ ತೊ ದೊಡ್ತ್ಯಾನ್ ಮಾಗ್ತಾ” ಮ್ಹಣ್ ಸಾಂತ್ ಆಗುಸ್ತಿನ್ ಮ್ಹಣ್ತಾ.

ix) ಸಾಂಕ್ತುವಾರಿಕ್ ವರ್ತೊ ಮಾನ್ ದಿಂವ್ಕ್ ಜಾಯ್. ಫೊಟೊ ಕಾಡ್ತಲ್ಯಾಂನಿ ಥಂಯ್ ವಚುಂಕ್ ವಾ ಬಾಂಕಾಂಚೆರ್ ವಾ ಕದೆಲಾಂಚೆರ್ ಚಡುಂಕ್ ಅವ್ಕಾಸ್ ನಾ. ಸಾಂಕ್ತುವಾರಿಚ್ಯಾ ಮೆಟಾಂಚೆರ್ ಲೊಕಾಕ್ ಬಸೊವ್ನ್ ಫೊಟೊ ಕಾಡ್ಚೆಂಯ್ ಆಡ್ವರ್ಲಾಂ. ಖಂಯ್ಚ್ಯೆಯ್ ರಿತಿರ್ ಹ್ಯೆ ಸುವಾತೆಚೆಂ ಪವಿತ್ರ್ ಲಕ್ಷಣ್ ಭೊಂಗೊಂವ್ಚೆಂ ಆಡ್ವರ್ಲಾಂ.

x) ಎವ್ಕರಿಸ್ತಾ ವೆಳಾ ಇಗರ್ಜೆ ಭಿತರ್ ಚಡ್ ಮ್ಹಳ್ಯಾರ್ ತೆಗಾಂನಿ ಫೊಟೊಗ್ರಫಿ ಆನಿ ವಿಡಿಯೊಗ್ರಫಿ ಕರುಂಕ್ ಅವ್ಕಾಸ್ ಆಸಾ. ಹೆ ಇಗರ್ಜೆ ಭಿತರ್ ಚಲ್ಚೆ ಲಗ್ನ್, ಒಡ್ದ್, ಆನಿ ಹೆರ್ ಪವಿತ್ರ್ ಸಂಭ್ರಮ್ ಆಸುಂಯೆತ್. ಪೂಣ್ ಸಮುದಾಯಾಚ್ಯಾ ಸಂಭ್ರಮಾಂನಿ ಫಿರ್ಗಜ್ ವಿಗಾರಾನ್ ನೆಮ್ಲಲೊ ಫೊಟೊಗ್ರಫರ್ ಆನಿ ವಿಡಿಯೊಗ್ರಫರ್ ಹಿ ಸೆವಾ ದಿತಾತ್.

xi) ಫೊಟೊಗ್ರಫರ್, ವಿಡಿಯೊ ಮನ್ಶಾಂನಿ ಆಪ್ಣಾ ಲಾಗಿಂ ಆಸ್ಚ್ಯೊ ವಸ್ತು, ಪೊತೆಂ ಲೊಕಾಚ್ಯೆ ದಿಷ್ಟಿ ಭಾಯ್ರ್ ದವ್ರುಂಕ್ ಜಾಯ್. ತ್ಯೊ ಖಂಯ್ಚ್ಯೆಚ್ ರಿತಿರ್ ಆಡ್ಕಳಿಚ್ಯೊ ಜಾಯ್ನಾಶೆಂ ಪಳೆಜೆ.
ಆಮಿ ವಾಪರ್ತಾಂವ್ ತಿ ಪವಿತ್ರ್ರ್ ಸುವಾತ್ ಆನಿ ಆಮಿ ಖರ್ಚಿತಾಂವ್ ತ್ಯಾ ಪವಿತ್ರ್ ವೆಳಾ ತೆವ್ಶಿಂ ಆಮ್ಚೆಂ ಸಮರ್ಪಣ್ ನವ್ಯಾನ್ ಕರ್ಯಾಂ. ಸಾಂ ಪಾವ್ಲ್ ಥೆಸ್ಸಲೊನಿಕಾಗಾರಾಂಕ್ ಪಯ್ಲ್ಯಾ ಪತ್ರಾಂತ್ ಸಾಂಗ್ತಾ ತಶೆಂ ಮಾಗ್ಣೆಂ ಆಮ್ಚೊ ಸ್ವಾಸ್ ಜಾಂವ್: “ಖಳನಾಸ್ತಾಂ ಮಾಗಾ. ಸರ್ವ್ ಘಡಿತಾಂನಿ ದೆವಾಕ್ ಅರ್ಗಾಂ ದಿಯಾ” (5:17-18). ಸೊಮಿ ಆಪ್ಲ್ಯಾ ಘರಾಂತ್ ಖರೊಚ್ ವಸ್ತಿ ಕರ್ತಾ ಮ್ಹಣ್ ಆಮ್ಚ್ಯಾ ವರ್ತನಾಂತ್ ದಾಕಯ್ಜೆ. ಪಾಪಾ ಫ್ರಾನ್ಸಿಸ್ ಅಶೆಂ ಶಿಕಯ್ತಾ: “ಆಮ್ಚ್ಯೆ ಥಂಯ್ ಏಕ್ ಪವಿತ್ರ್ ಉಜೊ ಆಸುಂಕ್ ಜಾಯ್… ತೊ ನಿರಂತರ್ ಜಳ್ತಾ ಆನಿ ಕಿತೆಂಚ್ ತೊ ಪಾಲ್ವೊಂವ್ಕ್ ಸಕನಾ. ತೆಂ ತಿತ್ಲೆಂ ಸೊಂಪೆಂ ನ್ಹಯ್. ಪೂಣ್ ತೆಂ ಹ್ಯೆ ಪರಿಂ ಆಸುಂಕ್ ಜಾಯ್” (ಲೊಕಾಕ್ ಶಿಕೊವ್ಣ್, ಜೂನ್ 9, 2021). ಕ್ರಿಸ್ತಿ ಭಾವಾಡ್ತ್ಯಾಂಚ್ಯಾ ಕಾಳ್ಜಾಂತ್ ಭಾವಾಡ್ತಾಚೊ ಉಜೊ ಜಳ್ತೊ ಸಾಂಬಾಳುಂಕ್ ಯಾಜಕಾಂಕ್ ಜವಾಬ್ದಾರಿ ಆಸಾ. ಇಗರ್ಜೊ ಹಾಕಾ ಅವ್ಕಾಸ್ ದಿಂವ್ಚ್ಯೊ ಜಾಯ್ಜೆ. ಹ್ಯೆ ವಿಶಿಂ ಗರ್ಜೆಚಿ ಶಿಕೊವ್ಣ್ ಜಾಯ್ ಆನಿ ಆಪ್ಣಾಕ್ ವಾ ಲೊಕಾಕ್ ಬರೆಂ ಲಾಗ್ತಾ ತೆಂ ಕರ್ಚೆಂ ಆಮ್ಚಿ ವಿಂಚೊವ್ಣ್ ಜಾಂವ್ಚಿ ನ್ಹಯ್.
ಪವಿತ್ರ್‍ಪಣಾಚೆಂ ಚಿಂತಪ್, ಮಾಗ್ಣ್ಯಾಚೆಂ ವಾತಾವರಣ್ ದೆವಾಚ್ಯಾ ಘರಾಂತ್ ಸಾರ್ಕಿ ಮಾಂಡಾವಳ್ ಆಸಶೆಂ ಕರುಂಕ್ ಹೆ ನಿರ್ದೇಶ್ ಆನಿ ನಿಯಮಾಂ ಪಾಳ್ಚ್ಯೆ ಉದೆಶಿಂ ಹಾಂವ್ ಕ್ಲೆರಿಕ್, ರೆಲಿಜಿಯೊಸ್ ಆನಿ ಲಾಯಿಕ್ ಭಾವಾಡ್ತ್ಯಾಂಚೊ ಸಹಕಾರ್ ಆಶೆತಾಂ. ತುಮ್ಕಾಂ ಸರ್ವಾಂಕ್ ದೇವ್ ಬೆಸಾಂವ್ ದಿಂವ್.
ಮಂಗ್ಳುರಾಂತ್ ಬಿಸ್ಪಾಚ್ಯಾ ಘರ್ಚ್ಯಾ ಬಿಸ್ಪಾಚ್ಯಾ ದಫ್ತರಾ ಥಾವ್ನ್ ಸಾಂ ಪೆದ್ರು ಆನಿ ಪಾವ್ಲುಚ್ಯಾ ಸಂಭ್ರಮಾ ದಿಸಾ 2021 ಜೂನ್ 29ವೆರ್ ಪಾಟಯ್ಲಾಂ.

+ಪೀಟರ್ ಪಾವ್ಲ್ ಸಲ್ಡಾನ್ಹಾ
ಮಂಗ್ಳುರ್ಚೊ ಬಿಸ್ಪ್

ಛಾಯಾಗ್ರಾಹಕರು ಮತ್ತು ವಿಡಿಯೋಗ್ರಾಫರ್‍ಗಳಿಂದ ಅನುಸರಿಸಬೇಕಾದ ನಿಯಮಗಳು

Transaltion is in progress. Kindly be patient.

ಆತೀ ವಂದನೀಯ ಡಾ| ಪೀಟರ್ ಪಾವ್ಲ್ ಸಲ್ಡಾನ್ಹಾ
ಧರ್ಮಾಧ್ಯಕ್ಷರು,
ಮಂಗಳೂರು ಧರ್ಮಪ್ರಾಂತ್ಯ